सत्र न्यायालय जलगाव : सुलेमान खान डिफॉल्ट बेल प्रकरणात 4 आरोपींना नोटीस

November 25, 2025 Mateen Patel

राज्य सरकारच्या अर्जावर सुनावणीला सुरुवात

जलगाव : 24 नोव्हेंबर 2025

जामनेर येथील एका गंभीर गुन्ह्याप्रकरणी डिफॉल्ट बेलवर सुटलेल्या चार आरोपींच्या जामीन आदेशावर पुनर्विचार करण्यासाठी राज्य सरकारतर्फे दाखल करण्यात आलेल्या अर्जावर आज जलगाव सत्र न्यायालयात सुनावणी झाली. प्रकरणाची नोंद घेत न्यायालयाने संबंधित चारही आरोपींना नोटीस बजावली आहे.

न्यायालयातील कार्यवाही

सत्र न्यायाधीश एस. एन. राजुरकर यांच्या खंडपीठासमोर
अपराधिक विविध अर्ज क्रमांक 584/2025 वर सुनावणी झाली.

न्यायालयाने नोटीस देण्यात आलेले आरोपी —

अभिषेक राजपूत

रंजन @ रंजीत माताडे

घनश्याम @ सूरज शर्मा

दीपक घीसाडी

या आरोपींना जामनेर न्यायालयाने 11 नोव्हेंबर 2025 रोजी BNSS कलम 483(3) अंतर्गत डिफॉल्ट बेल मंजूर केली होती. राज्य सरकारने या बेल आदेशाविरुद्ध पुनर्विचार अर्ज दाखल केला आहे.

न्यायालयाने चारही आरोपींना न्यायालयात हजर राहून स्पष्टीकरण देण्याचे निर्देश दिले आहेत.
राज्य सरकारची बाजू

राज्य सरकारतर्फे अतिरिक्त पोलीस अभियोक्ता अॅड. सुनील चोरडिया यांनी युक्तिवाद केला.
तपास अधिकारी उपअधीक्षक अण्णासाहेब घोलप हे देखील उपस्थित होते.

अभियोजन पक्षाकडून डिफॉल्ट बेलची परिस्थिती, प्रकरणातील उपलब्ध कागदपत्रे आणि गुन्ह्याचे स्वरूप याबाबत माहिती न्यायालयासमोर सादर करण्यात आली.
तक्रारदाराची बाजू

तक्रारदाराच्या बाजूने अॅड. शरीफ पटेल यांनी हस्तक्षेप अर्जाद्वारे आपली मते न्यायालयात मांडली.
त्यांना एकता संघटनाचे फारूक शेख, अनीस शाह, मतीन पटेल, अॅड. आमिर शेख, आरिफ शेख यांनी सहकार्य केले.

फरियादी रहीम खान आणि शाहरुख खान देखील सुनावणीवेळी उपस्थित होते.

महत्त्वाचा निर्देश

न्यायालयाने प्रतिवादी क्रमांक 5 असलेल्या
सहायक अधीक्षक महेश उदार यांना महत्वाचे दस्तऐवज (07 नोव्हेंबर 2025 रोजीच्या आरोपपत्रावरील क्वेरी पेज) न्यायालयाच्या ताब्यात जमा करण्याचे आदेश दिले आहेत.

हे दस्तऐवज प्रकरणातील महत्त्वाचे कागदपत्र म्हणून न्यायालयाने नोंदवले आहे.